“Azərsun Holdinq" ölkədə əsas ərzaq məhsullarının idxalçısı və topdan satışını həyata keçirən şirkətdir. Bu səbəbdən dünən Sumqayıtda baş verən yanğın müxtəlif müzakirələrə səbəb olub. Hazırda hər kəsi maraqlandıran suallardan biri bu hadisənin ərzaq məhsullarının qiymətlərinə necə təsir edəcəyidir. Bu haqda sahə ekspertləri aprelin 29-da Reporta danışıblar.
Sığorta eksperti İlkin İbrahimov sözügedən yanğını ölkə əhəmiyyətli bir hadisə hesab edir. Onun fikrincə, oradakı vəziyyət ölkənin ərzaq təhlükəsizliyinə mənfi təsir göstərə bilər.
“Sığorta təzminatının verilməsi uzun müddət çəkə bilər. Çünki öncə istintaq prosesi yekunlaşmalıdır. İşin mənfi tərəfi odur ki, təzminat ödəməli olan sığorta şirkəti də “Azərsun Holding”ə məxsusdur. Ona görə də demək olar ki, holdinq hər bir halda maliyyə baxımından çətin duruma düşəcək. Ümid edək ki, bu hadisəyə görə gələcəkdə ərzaq məhsullarının qiyməti qalxmayacaq”, - deyə sığorta eksperti bildirib.
İqtisadçı ekspert Eldəniz Əmirovun söylədiyinə görə, yaranmış situasiya psixoloji gərginlik yarada bilər.
“İstər maddi baxımdan, istər strateji əhəmiyyət baxımından, istərsə də psixoloji baxımdan itki böyükdür. Bu hadisənin ən mənfi təsiri isə satış mərkəzlərində suni qiymət artımlarına səbəb ola bilməsidir”, - E.Əmirov deyib.
Lakin o vurğulayıb ki, yanğına görə ajiotaj yaratmağa gərək yoxdur: “Azərsun Holdinq”in kərə yağı bazarında payı cəmi 5-7% təşkil edir. Azərbaycan həm bitki yağlarına, həm də kərə yağına olan tələbatı idxal hesabına ödəyir. Kərə yağları, əsasən, Yeni Zellandiyadan gətirilir. Burada sadəcə xüsusi çəki və ölçüyə salınır, sonra isə qablaşdırılır".
Sonda iqdisadçı əlavə edib ki, az miqdarda qiymət artımı ehtimalı var, amma yağların qiymətinin süni qaldırılmasına əngəl olmaq lazımdır.
