Ölkədə bu həftə ərzində, 9-13 avqust tarixlərində yol qəzaları nəticəsində 9 piyada vurulub, onlardan 4-ü dünyasını dəyişib.
Binəqədi rayonu ərazisində “Toyota” markalı avtomobillə paytaxt sakini vurulub. Piyada aldığı xəsarətlərdən xəstəxanada vəfat edib.
Qubada 1957-ci il təvəllüdlü qadın minik avtomobillə vurularaq ölüb. Hadisə şəhərin Heydər Əliyev prospektində qeydə alınıb.
Xaçmazın Yalama kəndində avtomobil piyadanı vurub. O, sürücü tərəfindən Xaçmaz Rayon Mərkəzi Xəstəxanasına aparılarkən yolda dünyasını dəyişib.
Bakıda Buzovna qəsəbəsində ölümlə nəticələnən yol qəzası baş verib. Paytaxt sakini idarə etdiyi “VAZ-21099” markalı avtomobillə yolu keçən kişini vurub. Piyada hadisə yerində vəfat edib.
Naftalanda 2010-cu il təvəllüdlü piyada vurulub. Azyaşlı xəstəxanaya yerləşdirilib. Onun vəziyyətinin kafi olduğu bildirilir.
Gəncənin Nizami Gəncəvi prospektində "Opel" markalı minik maşını yolu keçmək istəyən 44 yaşlı kişini vurub. Piyadanın həyatı təhlükəsi olmadığı bildirilir.
Bakı-Qazax magistral yolunun Şəmkir ərazisindən keçən hissəsində avtomobil orta yaşlı kişini vurub. Piyadanın vəziyyəti kafidir.
İmişli şəhərində naməlum avtomobil tərəfindən 14 yaşlı Xubyarlı kənd sakini vurulub. Piyada sınıq xəsarəti ilə Şirvan Şəhər Xəstəxanasına yerləşdirilib. Sürücü hadisə yerindən qaçıb.
Bakının Xətai rayonunda avtomobil yolu keçən 1976-cı il təvəllüdlü qadını vurub. Yaralı təcili tibbi yardımın köməkliyi ilə xəstəxanaya çatdırılıb.
Faktlarla bağlı araşdırmalar aparılır.
2021-ci ilin yanvarın 1-dən martın 31-nə qədər ölkədə piyadanın vurulması ilə nəticələnən 180 yol qəzası qeydə alınıb. Hadisələr zamanı 70 nəfər dünyasını dəyişib, 121 piyada isə müxtəlif bədən xəsarətləri alıb.
