Günay Məmmədovanın Mənzil İnşaatı Dövlət Agentliyinə məxsus sosial mənzillərin güzəştli şərtlərlə ayrılması üçün müxtəlif şəxslərdən rüşvət alması barədə cinayət işi məhkəməyə göndərilib. Bu barədə Baş Prokurorluq oktyabrın 15-də məlumat verib.
Günay Məmmədova 2019-2020-ci illər ərzində 46 nəfərə məxsus cəmi 703 min 700 manat pul vəsaitini ələ keçirməkdə şübhəli bilinir.
Vurulmuş ziyanın 134 min 600 manat hissəsinin ödənilməsi təmin edilib.
Faktla bağlı “dələduzluq - xüsusilə külli miqdarda ziyan vurmaqla törədildikdə” və “vəzifəli şəxs tərəfindən bilə-bilə qanunsuz hərəkətlər etməyə görə ona rüşvət verməyə təhrik etmə” maddələri ilə cinayət işi Bakı Ağır Cinayətlər Məhkəməsinə göndərilib.
