Qışın ilk günündə Bakının Fəvvarələr meydanında ənənəvi “Soyuq əllər, isti ürək” xeyriyyə yarmarkası açılıb. Yeni il yarmarkası yanvarın 15-dək davam edəcək.
Tədbirin təşkilatçısı olan “Nargis Fond” sponsorlarla birlikdə yarmarkadan toplanan vəsaitləri müxtəlif xəstəliklərdən əziyyət çəkən uşaqların müalicəsinə yönəldir. Hər il uşaq evlərinin sakinləri yarmarkanın qonağı olur.
Xeyriyyə yarmarkası kiçik taxta evlərdə təşkil edilib. Bura gələn hər kəs Yeni il hədiyyələri, suvenirlər, kitablar, geyim əldə etməklə yanaşı, müxtəlif şirniyyatlardan və milli yeməklərdən dada bilər.
Məsələn, kartof çipslərinin qiyməti 2,5 manat, kumpirin qiyməti isə içliyindən asılı olaraq 5-7 manatdır. Meksikan burritolar 7 manatdan başlayır, plovlu pizzaları isə 2,5 manata dadmaq olar. İsinmək istəyənlər üçün isə samovar çayı 1 manata, glintveyn 9 manata təklif olunur.
Yarmarka 2013-cü ildən etibarən “Nargis Fond”un təşkilatçılığı və dəstəyi ilə keçirilir. 2020-ci ildə isə koronavirus pandemiyası səbəbindən yarmarka keçirilməmişdir.
[URIS id=15293]
