Azərbaycanda 3174 istixana mövcuddur. Hər bir istixananın orta ərazisi 0,47 hektar təşkil edir. Bu da ötən ilin eyni dövrü ilə müqayisədə 9% çoxdur. Mövzu ilə bağlı CBC TV reportaj hazırlayıb. Reportajda deyilir ki, istixanaların ərazisinin böyüməsi xərclərin azaldılmasına gətirib çıxardır. İstixanalarda əsasən pomidorlar yetişdirilir. Cari ilin 9 ayında istixanalarda 280 min tondan çox pomidor istehsal olunub. Bu da ötən ilin eyni dövrü ilə müqayisədə 20% çoxdur.
İstehsal olunan məhsullar əsasən Rusiyaya ixrac olunur. Azərbaycan pomidorları yüksək keyfiyyəti və nisbətən yüksək qiyməti ilə fərqlənir. Lakin son zamanlar Rusiyada həm daxili istehsal, həm də Orta Asiya ölkələrindən idxal çoxalıb. Bu da Azərbaycan məhsullarının Rusiya bazarlarında satışının rentabelliyini sual altında qoyur.
Azərbaycan Meyvə - Tərəvəz İstehsalçıları və İxracatçıları Assosiasiyasının sədr müavini Jalə Əmirbəyovanın sözlərinə görə, yuxarıda qeyd olunan problemlər yaranarsa, istixanalarda başqa məhsulların istehsalını təşkil etmək olar: “Bəzi istixanalarda ənənəvi məhsulların istehsalını gül kələmi, brokkoli, “Aysberq” salatı kimi məhsulların istehsalı ilə əvəz etmək olar”. Sədr müavinin dediyinə görə, əlavə ixrac bazarları da araşdırılmalıdır. Lakin bunun üçün istixanalar əlavə sertifikasiyadan keçməlidir. Müvafiq sertifikasiyanı xarici mütəxəssislər keçirir. Onların dəvəti böyük maliyyə tələb edir: “Bu məsələdə dövlətin dəstəyinə ehtiyacımız var”, - deyə Jalə Əmirbəyova bildirib.
Dövlət Statistika Komitəsinin məlumatına əsasən, 1 oktyabr tarixinə Azərbaycanda istixanaların ərazisi 1,5 min hektardan çoxdur.
