Dünən, oktyabrın 3-də dövlət başçısı Suqovuşanda olarkan oranın əhəmiyyətindən danışıb.
Suqovuşan qəsəbəsinin azad edilməsinin strateji nöqteyi-nəzərdən çox böyük əhəmiyyət kəsb etdiyini vurğulayan dövlətimizin başçısı deyib: “İşğal dövründə ermənilər yay mövsümündə suyu kəsirdilər, qış mövsümündə isə suyu buraxırdılar. Yayda bizim kəndlilərimiz susuz qalırdı, qışda isə suyu buraxıb daşqınlara səbəb olan təbii fəlakət törədirdilər”.
Bu il Suqovuşan su anbarından bu günə qədər suvarılmayan, yaxud da ki, az suvarılan 30 min hektar torpağa su verilmişdir və indi kanallarda təmir işləri gedir.
“Artıq su mənbələrinin bütün xəritələri tərtib edilib və yeni su anbarlarının tikintisi gündəlikdə duran məsələdir", - deyə dövlət başçısı bildirib.
Qeyd edək ki, 1976-cı ildə istismara verilmiş Suqovuşan su anbarı Tərtərçay və Turaqaçay çaylarından daxil olan sular hesabına formalaşır. Ümumi həcmi 5,86 milyon kubmetr olan su anbarından Tərtər, Ağdərə, Goranboy, Yevlax, Bərdə, Ağdam, Ağcabədi rayonlarının ümumilikdə 96 min 217 hektar torpaq sahələrinin suvarılması nəzərdə tutulmuşdur.
