Noyabrın 25-dən Azərbaycanda təhsil tələbə krediti üçün müraciətlərin qəbuluna başlanılıb. Tələbələrin təhsil krediti barədə fikirlərini öyrənmək məqsədilə Report 27 noyabr tarixində rel="nofollow">reportaj hazırlayıb.
Reportajdan məlum olur ki, heç də bütün tələbələr kreditin şərtlərindən razı deyil: “300 baldan sonra onsuz da çox adam pulsuz yeri seçir. Müddət çox uzun, faiz isə yüksəkdir. Tələbə ölkəni tərk edə bilmir”, - deyə tələbə Miryusif Kazımov bildirib.
Tələbə Həsən Hüseynov isə bildirib ki, bir çox tələbələr ali təhsil müəssisələrinə 17 yaşından qəbul olunur və həmin kreditdən istifadə edə bilmir.
Təhsil eksperti Kamran Əsədovun dediyinə görə, portaldan qeydiyyatdan keçmək üçün tələbənin öz adına mobil nömrə olmalıdır. Ölkədə 47 min tələbənin yaşı 18-dən aşağıdır və onların öz adlarına mobil nömrələri yoxdur. “İkinci ciddi problem kredit faizinin kifayət qədər yüksək olmasıdır. Güzəştli kreditin faizi 2%-dir, adi kredit isə 6%-nən verilir. Bu kifayət qədər böyük vəsaitdir”, - deyə ekspert əlavə edib.
Kamran Əsədov kreditin müsbət tərəflərini də vurğulayıb: “Azərbaycan dünyada təhsilə və tələbəyə kredit verən 60-cı ölkədir. Son illərdə 7 min tələbə təhsil haqlarını ödəyə bilmədiyi üçün təhsillərini yarımçıq qoyub. Kredit onlar üçün kömək olacaq. Amma hesab edirəm ki, qaydalar sadələşdirilməlidir”.
