2021-ci ildə doğumu qeydə alınan uşaqlara Vətən müharibəsi iştirakçılarının şərəfinə qoyulan adlar arasında Polad və Xudayar üstünlük təşkil edib. Belə ki, ötən il 306 körpəyə Polad, 82 körpəyə isə Xudayar adı verilib. Bu haqda yanvarın 2-də Report məlumat yayıb.
2018-ci ildə 55 uşağa, 2019-cu ildə 53 uşağa Polad adı verilibsə, 2020-ci ildə bu rəqəm 193 olub. Həmçinin 2020-ci ildə bir uşağa Poladhəşim adı verilib. Xudayar adı isə 2018-ci ildə bir, 2020-ci il ərzində cəmi 3 uşağa qoyulub.
Polad adı Azərbaycan Ordusunun general-mayoru Polad Həşimovun şəhid olmasından sonra populyarlaşıb. Xudayar adı isə Vətən müharibəsində Dövlət Sərhəd Xidmətinin hərbçisi Xudayar Yusifzadənin şəhid olmasından sonra məşhurlaşıb. 22 yaşlı gizir oxuduğu “Vətən yaxşıdır” mahnısının ifası ilə ölkədə tanınıb.
Qeyd edək ki, bugün Azərbaycanın Milli Qəhrəmanı Polad Həşimovun doğum günüdür. O, 2020-ci il iyulun 14-də Tovuz istiqamətində baş verən döyüşlər zamanı Ermənistan Silahlı Qüvvələrinin hücum cəhdinin qarşısını alarkən şəhid olub.
