Oktyabrın 13-də Türkiyə lirəsinin Azərbaycan manatına qarşı rəsmi məzənnəsi daha 0,4% azalaraq 0,1881 manat təşkil edib. Bu rəqəm yeni tarixi minimum sayılır. Hazırda Türkiyə Mərkəzi Bankının məlumatına görə, 1 ABŞ dollarının satış qiyməti 9,1580 lirədir.
Bəs Türk lirəsinin dəyərini itirməsi Azərbaycan iqtisadiyyatına necə təsir göstərə bilər? Bu barədə iqtisadçı ekspert Rəşad Həsənov “Report”a açıqlamasında danışıb.
Ekspertin sözlərinə görə, ilk növbədə lirənin dəyər itirməsi Türkiyədən Azərbaycana məhsul idaxlını artıracaq. Lirənin dəyərsizləşməsi həm də Türkiyədə turizm xidmətlərinin əlçatanlığını artırır.
Mənfi təsir kimi isə Azərbaycandan ixrac olunan məhsulların Türkiyə bazarlarında rəqabətliliyin zəifləyə biləcəyini qeyd etmək olar. Azərbaycanda istehsal olunan məhsulun maya dəyəri dollarla ifadədə Türkiyədə yerli istehsal olunan məhsullarla müqayisədə daha baha başa gəlir. Və bu səbəbdən bazara baha qiymətə təklif olunur. Nəticədə Türkiyəyə ixrac olunan məhsulların rəqabət aparma imkanlarını məhdudlaşdırır.
