Türk lirəsi Azərbaycan manatına qarşı ucuzlaşıb. Hazırda 1 lirə 0,1784 manat təşkil edir. Ucuzlaşmanın Azərbaycan iqtisadiyyatına təsiri barəsində iqtisadçı-ekspert Vüqar Bayramov 22 oktyabr tarixində facebook səhifəsində paylaşım edib.
İqtisadçı-ekspertin sözlərinə görə, türk lirəsinin ucuzlaşması Azərbaycanın ticarət dövriyyəsinə ciddi təsir göstərmir: “Azərbaycanla Türkiyənin ticarət dövriyyəsində enerji ixracatının payı yüksəkdir. 2021-ci ildə Azərbaycan Türkiyəyə 8 milyard kubmetr təbii qaz nəql edəcək. Qazın qiyməti və ödəniş valyutası məhz ABŞ dolları ilə müəyyənləşdirildiyinə görə milli valyutadakı məzənnə dəyişikliyi buna təsir göstərmir”.
Həmçinin Vüqar Bayramov qeyd edib ki, Türkiyə lirəsinin ucuzlaşması qonşu dövlətdən ölkəmizə idxal edilən məhsulların xərcinin azalmasına və Türkiyədən daha çox məhsulun idxal edilməsinə gətirib çıxara bilər. Nəticədə bu, Türkiyə məhsullarının dünya və Azərbaycan bazarında ucuzlaşmasına gətirib çıxara bilər.
Azərbaycanla Türkiyə arasında ticarət dövriyyəsi 2020-ci ildə 4,5 milyard ABŞ dollarına yaxın olub. Azərbaycanın qeyri-neft ixracatının təxminən 33%-ə yaxını Türkiyə bazarına yönəlib.
