Tərtər, Ağdam, Beyləqan rayonları istiqamətində yerləşən hərbi hissələrdə xidmət edən bəzi hərbi qulluqçuların qanunazid əməlləri ilə əlaqədar 18 dekabr tarixində Baş Prokurorluq, Daxili İşlər Nazirliyi və Dövlət Təhlükəsizliyi Xidməti birgə məlumat yayıblar.
Bildirilib ki, zərərçəkmiş şəxslərin, onların hüquqi varislərinin ibtidai istintaqın gedişi və nəticələri, eləcə də məhkəmə qərarları ilə bağlı çoxsaylı müraciətləri nəzərə alınaraq, cinayət işlərinin icraatının təzələnməsi haqqında qərarlar qəbul edilib.
Dövlət qurumları tərəfindən yayılan məlumatda deyilir ki, ibtidai araşdırma məlumatlarının kütləvi informasiya vasitələrində və sosial mediada müvafiq icazə olmadan yayılması yolverilməzdir. Məsələ ilə bağlı cəmiyyətdə qəsdən yanlış fikir formalaşdıran şəxslər barəsində qanunvericiliyə uyğun tədbirlər görüləcək.
Qeyd edək ki, sözügedən hadisə 2017-ci ilin may-iyun aylarında baş vermişdir. Bir qrup hərbi qulluqçu müvafiq səlahiyyətlərə malik olmadıqları halda cəsusluqda şübhəli hesab etdikləri şəxsləri sorğulama prosesinə cəlb edib və onlara fiziki və psixi zor tətbiq ediblər. Qeyri-insani və ləyaqəti alçaldan rəftar zərərçəkmiş şəxslərin ölümünə və digər ağır nəticələrə səbəb olub.
Bu faktlar əsasında Cinayət Məcəlləsinin müvafiq maddələri ilə cinayət işləri başlanılmışdır. Yekunda 19 təqsirləndirilən şəxs 5 cinayət işi üzrə cəzalara məhkum edilmişdir.
