“TEKNOFEST” festivalı çərçivəsində ətraf mühitin qorunması sahəsində keçirilən müsabiqəyə qeydiyyat artıq başlayıb. Bu haqda 31 yanvar tarixində Rəqəmsal İnkişaf və Nəqliyyat Nazirliyinin saytında məlumat verilib.
Müsabiqə bərpa olunan enerji mənbələrindən istifadə, yeni texnologiyaların təşviqi, cari texnologiyaların təkmilləşdirilməsi, təbii sərvətlərdən ehtiyatlı istifadəni asanlaşdıracaq texnologiyalar üzrə mövzuları əhatə edir.
Müsabiqədə 3 kateqoriya üzrə iştirak etmək mümkündür: A, B və C. A kateqoriyası üzrə orta məktəb şagirdləri, B kateqoriyası üzrə ali məktəb tələbələri, C kateqoriyası üzrə fərdi iştirakçılar və ya onlardan ibarət komandalar müsabiqəyə qoşula bilərlər.
Sözügedən müsabiqə üzrə Mükafat fondu şagirdlər üçün I yer 4000 AZN, II yer 2000 AZN və III yer 1000 AZN təşkil edir.
B kateqoriyasını təmsil edən tələbələr, C kateqoriyası üzrə startaplar və fərdi sahibkarlar üçün Mükafat fondu I yer 6000 AZN, II yer 4000 AZN, III yer isə 2000 AZN-dir.
Son qeydiyyat tarixi 17 fevral 2022-ci ildir. Qeydiyyat üçün linkə daxil olmaq olar.
“TEKNOFEST” Aerokosmik və Texnologiya Festivalı cari ilin 26–29 may tarixlərində Bakıda keçiriləcək. Festivalın keçirilməsində əsas məqsəd aviasiya, kosmik sənaye, rəqəmsal iqtisadiyyat və ətraf mühitin qorunması kimi sahələrin gənclər arasında təbliği, bu sahələrdə sahibkarlığın təşviq edilməsi, eləcə də milli texnologiyaların geniş ictimaiyyətə təqdim olunmasıdır.
