ABŞ-nin prezidenti Donald Trampın xüsusi nümayəndəsi, milyarder Stiv Uitkoffa məxsus "Gulfstream G650" təyyarəsi bu gün səhər saatlarında Bakıya eniş edib.Təyyarə Moskvanı tərk etdikdən təxminən iki saat sonra Heydər Əliyev Beynəlxalq Aeroportuna çatıb.
İnsanoid.com xəbər verir ki, bu barədə “Flightradar” portalının məlumatında deyilir.
Stiv Uitkoff Ər-Riyadda Ukrayna nümayəndə heyəti ilə danışıqlarda iştirak etdikdən sonra Moskvaya gedib. 13 mart axşamı o, Rusiyada atəşkəs şərtlərini müzakirə etmək üçün rus rəsmiləri ilə görüşüb. Onun Vladimir Putinlə görüşüb-görüşmədiyi rəsmi olaraq təsdiqlənməyib. Lakin Kremlin açıqlamasına görə,Putinin işgüzar görüşləri 01:30-da başa çatıb, Uitkoff isə həmin gün ABŞ-nin Moskvadakı səfirliyində bir saatlıq görüş keçirib.
Rusiya və ABŞ arasında tətbiq edilən qarşılıqlı sanksiyalara görə, Amerikanın sərnişin təyyarələrinin Rusiyada texniki xidmət və yanacaq doldurma imkanları məhdudlaşdırılıb. Bu səbəbdən "Gulfstream G650" təyyarəsi Moskva - ABŞ marşrutu üzrə birbaşa uçuş həyata keçirə bilməzdi. Ehtimal olunur ki,məhz bu səbəbdən Uitkoffun təyyarəsi Bakıda dayanaraq yanacaq doldurub və texniki yoxlamadan keçib.
"Flightradar24"- ün məlumatına əsasən, təyyarə Bakıdan qalxdıqdan bir neçə saat sonra Türkiyə hava məkanına daxil olub və ABŞ istiqamətində hərəkət edib. 13:20-də (Bakı vaxtı ilə) Uitkoffun təyyarəsi Türkiyənin Trabzon vilayəti üzərində qeydə alınıb.
Hələlik Stiv Uitkoffun Bakıda rəsmi görüşlər keçirib-keçirmədiyi məlum deyil. ABŞ və Rusiya tərəfləri də bu məsələyə münasibət bildirməyib.
