Azərbaycanda ulduz kateqoriyası olmadan fəaliyyət göstərən hotellər təkcə hotel haqqında deyil, ölkə haqqında da mənfi fikir formalaşdırırlar. Bu sözləri 16 dekabr tarixində Reporta açıqlamasında Azərbaycan Hotellər və Restoranlar Assosiasiyasının İdarə Heyətinin sədri Samir Dübəndi deyib.
“Ölkədə fəaliyyət göstərən hotellərin sayı rəsmi statisitikaya görə 650-dən çoxdur. Onların bir çoxu ulduz almadan, yəni kateqoriya sisteminə daxil olmadan binalarının üzərində, müxtəlif satış kanallarında ulduz sahibi olduqlarını göstərirdilər. Bu da turistin hüquqlarının pozulmasına gətirirdi”, - “Turizm haqqında” qanuna edilən dəyişikliyi şərh edərkən Assosiasiyasının sədri bildirib.
Samir Dübəndi söyləyib ki, ulduz kateqroiyası yerləşəcəyi yeri seçməkdə turist üçün ilk amillərdən biridir: “Turist özünə dörd ulduzlu hotel seçirdi, gəlib görürdü ki, həmin hotel aşağı kateqoriyalıdır və məyus olurdu. Hotelin vurduğu maddi və mənəvi ziyan təkcə hotel haqqında deyil, ölkə haqqında da mənfi fikir formalaşdırırdı”.
Onun fikrincə, ulduz kateqoriyasının müəyyənləşdirilməsi prosesi icbari xarakter daşımalıdır və cərimələr tətbiq olunmalıdır.
Həmçinin Samir Dübəndi əlavə edib ki, biznesin də maraqlarını unutmaq olmaz: “Sərt qapanmalar turizm müəssisələrinə böyük ziyan vurub. Bu gün müəssisələrin maliyyə durumu heç də sağlam deyil. Ona görə yaxşı olardı ki, təsnifat sisteminə qoşulmaq üçün xərclər ləğv edilsin və onların yerinə simvolik rəqəmlər təyin olunsun”.
Qeyd edək ki, dekabrın 14-də Milli Məclisin iclasında “Turizm haqqında” qanuna edilən dəyişikliyə əsasən, mehmanxanalar ulduz kateqoriyası müəyyənləşdirilmədən fəaliyyət göstərilməsinə görə 2000-5000 manatadək məbləğdə cərimə ediləcək.
