Bakı Şəhər İcra Hakimiyyətinin (BŞİH) sabiq Aparat rəhbəri Rasim Quliyev bugün, dekabrın 20-də son söz demək üçün məhkəmədən vaxt istəyib. Bakı Ağır Cinayətlər Məhkəməsində keçirilən prosesdə təqsirləndirilən şəxsin vəkili bildirib ki, bu işlə bağlı başqa şəxslərin barəsində cinayət işi başlanılmalı idi. Bu haqda APA məlumat yayıb.
Onun sözlərinə görə, Rasim Quliyev hazır sənədə qol çəkib və o zaman artıq tikinti işləri ilə bağlı müxtəlif dövlət strukturlarının rəyləri var idi. “Tikintiyə artıq razılıq verilmişdir. Bu ittihamların heç biri Rasim Quliyev tərəfindən törədilməyib. Bu səbəbdən onun barəsində bəraət hökmünün çıxarılmasını tələb edirik”, - deyə vəkil vurğulayıb.
Daha sonra sözügedən şəxsin digər vəkili çıxış edib: “BŞİH-nin keçmiş başçısı Hacıbala Abutalıbov 2017-ci ilin oktyabrında Rasim Quliyevi icra başçısının müavini səlahiyyətlərini müvəqqəti icra etməsinə dair sərəncam verib. Bu, qanuna ziddir”.
O əlavə edib ki, H.Abutalıbovun sübut kimi qiymətləndirilən sərəncamı qeyri-qanuni olaraq qəbul edilib və bu səbəbdən sübutlar siyahısından çıxarılmalıdır: “Belə olan halda Rasim Quliyevə elan edilmiş ittiham heç bir qanuni qüvvəyə malik olmur”.
Proses dekabrın 23-də davam edəcək.
Qeyd edək ki, prokuror təqsirləndirilən şəxsin 6 il müddətinə azadlıqdan məhrum edilməsini istəyib. Rəsmi məlumata əsasən, sözügedən şəxs Nəsimi rayonunda yaşayış binalarının və 1893-cü ildə inşa edilmiş tarixi abidə kimi dövlət tərəfindən mühafizə olunan evlərin sökülməsinə səbəb olub.
Rasim Quliyev “vəzifə səlahiyyətlərindən sui-istifadə”, “qanunla müəyyən olunmuş qaydaları pozmaqla tikinti və ya quraşdırma işlərinin aparılmasına icazə vermə” maddələri ilə ittiham olunur.
