Cari ilin sonunda Azərbaycanın mərhum şahmatçısı, beynəlxalq qrosmeyster Vüqar Həşimovun xatirəsinə həsr olunan beynəlxalq şahmat superturniri bərpa ediləcək. Bu barədə noyabrın 19-da Apa məlumat yayıb.
Məlumata görə, rapid və blitz üzrə təşkil olunacaq VII Vüqar Həşimov Memorialı dekabrın 17-də start götürəcək. Bakıda keçirilən yarışda 8 şahmatçı mübarizə aparacaq. Turnirə “Fairmont Baku” oteli ev sahibliyi edəcək.
Sözügedən turnir ilk dəfə 2014-cü ildə Şəmkirdə keçirilib. Hazırkı dünya çempionu Maqnus Karlsen 4 (2014, 2015, 2018, 2019), Azərbaycan şahmatçısı Şəhriyar Məmmədyarov isə 2 dəfə (2016, 2017) bu turnirin qalibi olub. 2020-ci ildəki yarış isə koronavirus pandemiyası səbəbindən baş tutmayıb.
Qeyd olunub ki, Vüqar Həşimov Memorialının yeni loqosu Vüqar Həşimovun silueti əsasında hazırlanıb. Qara fonda ağ tonda təqdim olunan Vüqar Həşimovun silueti kənar cizgilərinin birrəngli təsviri əsasında yaradılıb.
