Ləğv edilmiş Kütləvi İnformasiya Vasitələrinin İnkişafına Dövlət Dəstəyi Fondunun sabiq icraçı direktoru Vüqar Səfərli yanvarın 10-da apellyasiya şikayəti verib. Bu haqda onun vəkili Hikmət Əliyev Report-a məlumat verib.
Məlumata əsasən, vəkil apellyasiya şikayətini Bakı Apellyasiya Məhkəməsinə təqdim edib və V.Səfərli barəsində bəraət hökmünün çıxarılmasını istəyib.
Vüqar Səfərli 2021-ci ilin 21 dekabr tarixində 10 il 6 ay müddətinə azadlıqdan məhrum edilib. Həmçinin qurumda müvafiq vəzifələrdə çalışmış şəxslər barəsində polisin nəzarəti altına vermə qətimkan tədbiri seçilib.
Zərərçəkmiş qismində Medianın İnkişafı Agentliyi tanınıb.
Vüqar Səfərli və digərləri “mənimsəmə”, “cinayət yolu ilə əldə edilmiş pul vəsaitlərini leqallaşdırma”, “vəzifə səlahiyyətlərindən sui-istifadə”, “vəzifə saxtakarlığı” və digər maddələrlə ittiham olunub. Onların əmlak və bank əmanətlərinin üzərinə həbs qoyulub. İbtidai istintaq zamanı cinayət nəticəsində vurulmuş maddi ziyanın bir hissəsinin ödənilməsi təmin edilib.
Daha öncə, dekabrın 28-də sözügedən şəxsin müsadirə edilən əmlakının siyahısı məlum olub.
