Azərbaycanda sakinlər ƏDV-nin geri alınması ilə bağlı müəyyən çətinliklər yaşayır. Narazılıqlar əsasən sistemdə yaranan problemlərdən və bəzi obyektlərdə məhsulun qəbzinin verilməməsindən yaranır. Məsələ ilə bağlı 15 dekabr tarixində Apa araşdırma aparıb.
“Proqramda yüklənmə olur. Bəzən olur ki, proqram donur”, - deyə sakin gileylənib.
Digər sakinin sözlərinə görə isə, ən böyük çətinlik marketlərin bir çoxunda kassa aparatlarının köhnə nəsil olduqları üçün QR kodlu qəbzi ala bilməməsidir.
İqtisadiyyat Nazirliyi yanında Dövlət Vergi Xidmətinin media şöbəsinin rəisi Şahin Məmmədovun bildirdiyinə əsasən, 2022-ci ildən bir sıra sahələrdə yeni kassa aparatları tətbiq olunacaq, eyni zamanda bir çox kassa aparatları yeniləri ilə əvəz ediləcək. Onun sözlərinə görə, bunlar gözəllik salonları və tibbi sahələrdir.
Şahin Məmmədov məlumat verib ki, ƏDV-nin vətəndaşa geri qayratılmamasına səbəb qəbzdəki məlumatların (məhsulun və ya xidmətin adı, ölçü vahidi, miqdarı, bir vahidinin qiyməti və qəbzin məbləği, ƏDV, nəzarət kassa aparatının markası və zavod nömrəsi, 12 sombollu fiskal İD, malın QR kodu) düzgün qeyd olunmaması ola bilər.
“Alıcı tərəfindən məhsulun geri qaytarılması və ya 90 gündən sonra qəbzin sistemə daxil edilməsi hallarının baş verməsi də imtina üçün əsas tutala bilər”, - deyə o əlavə edib.
Qeyd edək ki, bugünə qədər xidmətdən 1,5 milyon vətəndaş faydalanıb, 120 milyon manatdan çox ƏDV geri qaytarılıb.
