Vətən müharibəsinin 22-ci günü, 2020-ci il oktyabrın 18-də Azərbaycan Ordusunun növbəti mühüm uğurları ilə yadda qalıb. Azərbaycan Prezidenti İlham Əliyev həmin gün “Twitter” (indiki “X”) sosial platformasında Cəbrayıl rayonunun Xudafərin qəsəbəsi və Hacılı, Hacı İsaqlı kəndlərinin işğaldan azad edildiyini elan edib. Bu, Ermənistanın 27 illik işğalından sonra baş verən əhəmiyyətli hərbi qələbələrdən biri idi.
Cəbhədə hərbi əməliyyatlar bütün istiqamətlərdə davam edib. Azərbaycan Ordusu cəbhənin müxtəlif nöqtələrində düşmənin 2 ədəd S-300 zenit-raket kompleksini, 3 ədəd BM-21 “Qrad” qurğusunu, 2 ədəd “Smerç” raket sistemi və beşdən çox tankı məhv edib. Füzuli ərazisində Ermənistanın hərbi hissəsi Azərbaycan Ordusu tərəfindən tam nəzarət altına alınıb. Ermənistan ordusunun Cəbrayıl, Ağdərə, Hadrut və Füzuli istiqamətlərində hücum cəhdləri dəf edilib və düşmən geri çəkilməyə məcbur edilib.
Günün ən əlamətdar hadisələrindən biri isə saat 12:30-da Cəbrayıl istiqamətində Ermənistan Hərbi Hava Qüvvələrinə məxsus “Su-25” təyyarəsinin Azərbaycan HHM qüvvələri tərəfindən vurulması olub. Bununla yanaşı, Azərbaycan Müdafiə Nazirliyi Füzuli istiqamətində döyüşlərdə düşmənin qaçıb atıb getdiyi hərbi texnikaların görüntülərini yayımlayıb.
Gəncə şəhərində Ermənistanın raket zərbələri nəticəsində dağıntılar altında qalanların xilas edilməsi işləri də davam edib. Fövqəladə Hallar Nazirliyinin məlumatına görə, 53 nəfər yaralı, 13 nəfər isə hə!ak olub.
Eyni zamanda, Horadiz istiqamətində uçuşlar keçirməyə çalışan Ermənistan ordusuna məxsus pilotsuz uçuş aparatı saat 13:00-da vurulub. Həmin gün düşmənin Xızı rayonuna atdığı raket də Azərbaycan HHM qüvvələri tərəfindən havada zərərsizləşdirilib.
