Bakıda Azərsu-nun əmlakını oğurlayan Rabil Şahmarov və Ramel Cəfərova hökm oxunub və hər iki şəxsə şərti cəza verilib. Bu barədə aprelin 28-də Report məlumat yayıb.
"Nurşah” MMC-nin rəsmiləri R. Cəfərov və R. Şahmarov külli miqdarda ziyan vurmaqla özgənin əmlakını gizli olaraq talayıblar.
Onlar Xəzərdə yerləşən “Böyük Zirə” adası ətrafında batmış gəmilərin çıxarılması və qara metal qırıntısı kimi təhvil verilməsinə köməklik göstərilməsi üçün 2020-ci ildə icarəyə gəmilər götürüblər.
Daha sonra hər iki şəxs dənizdə 1970-1990-cı illərdə inşa olunmuş “Azərsu”ya məxsus, istifadə üçün yararlı vəziyyətdə olan metal boruları aşkarlayıblar. Onlar “Azərsu”nun xəbəri olmadan həmin boru xətlərini dənizin dibindən çıxarıb sahilə daşıyıblar.
Ümumilikdə onlar “Azərsu” ASC-yə 640 164 manat dəyərində ziyan vurublar.
