Azərbaycanda yeni istehsal olunan dronların sınağı həyata keçirilib. Sınaq “Elm və Texnologiya Parkı” MMC və “Project Terra” MMC tərəfindən təşkil edilib. Bu barədə 17 dekabrda Report məlumat verib.
Əməkdaşlığın məqsədi drona quraşdırılmış mobil skanerin (LidarUSA Revolution 120) yoxlanılması olub.
Sözügedən skaner vasitəsilə böyük ərazilərin, insan üçün əlçatmaz yerlərin məlumatları tez bir zamanda yüksək dəqiqliklə əldə edilir. Bu məlumatlar xəritəçəkmə, 3D modellərin hazırlanması, müvafiq obyektlərin lokasiyasının müəyyən edilməsi üçün istifadə olunur.
Daha öncə “Project Terra” şirkətinin lazer skanerlərindən Şuşa və Ağdamda tikililərin, tarixi abidələrin, küçələrin dəqiq ölçülərinin, ən xırda detalların rəqəmsal formada əks etdirilməsində istifadə olunmuşdur.
Qeyd edək ki, Lidar işıq impulslarından istifadə edərək məsafə ölçmə və görüntüləmə texnologiyasıdır. Onun köməkliyi ilə əks olunan işıq impulsun geri qayıtması üçün sərf olunan vaxt ölçülür və obyeklə aparat arasında olan məsafə hesablanır. Bununla da yayılan həmin impuls nöqtələri əsasında obyektin görüntüsü hazırlanır.
