ABŞ-ın Nyu-York şəhərindəki Karnegi konsert zalında 8 Noyabr – Zəfər Günü münasibətilə bayram konserti keçirilib. Tədbir çərçivəsində Azərbaycanı Zəfərə aparan hadisələri əks etdirən fotosərgi də nümayiş etdirilib.
Londonda Zəfər Günü münasibətilə atəşfəşanlıq zamanı Müslüm Maqomayevin ifasında “Azərbaycan” mahnısı səsləndirilib. Bu haqda Azərbaycanın İngiltərədəki Səfirliyi Twitter səhifəsində paylaşım edilib.
Azərbaycanın Moskvadakı səfirliyində 44 günlük müharibədə qazanılan Zəfərin ildönümü qeyd olunub. Tədbirdə Azərbaycan Dövlət Himni səsləndirilib və müharibəni əks etdirən fotosərgi nümayiş edilib.
Həmçinin Kolumbiyanın paytaxtı Boqotada şəhərin simvolu sayılan məşhur “Colpatria” binası üçrəngli bayrağımızın rəngləri ilə işıqlandırılıb və “Azərbaycan Zəfər Günün mübarək” sözləri əks etdirilib. Bu haqda Azərbaycanın Meksikadakı Səfirliyi məlumat verib.
8 noyabr – Zəfər Günü tarixində dünyanın ən böyük Niaqara şəlaləsi Azərbaycanın dövlət bayrağının rənglərinə boyanıb.
Kanadanın Vankuver şəhərində fəaliyyət göstərən Azərbaycan Mədəniyyət Mərkəzində də bayram konserti keçirilib. Tədbir online formatda təşkil edilib və şəhid olan qəhrəmanlarımızın əziz xatirəsi bir dəqiqəlik sükutla yad edilib, Azərbaycanın Dövlət Himni səsləndirilib.
Niderlandın Haaqa şəhərində isə Zəfər Gününə həsr olunmuş “Qələbə və Sülh” adlı təntənəli konsert keçirilib.
