İşğaldan azad edilmiş ərazilərə 2025-ci ilə qədər 1 milyona yaxın yerli və xarici turistin səfər edəcəyi planlaşdırılır. Bu barədə 5 yanvar tarixində Dövlət Turizm Agentliyinin sədri Fuad Nağıyevə istinadən Report məlumat verib.
“Qarabağ regionu, xüsusilə də Şuşa, Hadrut, Füzuli, Suqovuşan, Şərqi Zəngəzur bölgələri turizmin müxtəlif növlərinin - eko, sağlamlıq, mədəni, təbiət, dağ və qış turizminin inkişafı üzrə zəngin resurslara, geniş imkanlara malikdir”, - deyə sədr bildirib.
O əlavə edib ki, “Zəfər marşrutları” konsepsiyası çərçivəsində Ağdamın işgüzar turizm mərkəzinə çevrilməsi də nəzərdə tutulub.
Fuad Nağıyevin sözlərinə görə, müvafiq turizm məhsulları hazırlanarkən Alban məbədləri, Qarabağ xanlığının irsi, İpək yolu kimi mədəni turizm potensiallarından istifadə olunacaq.
