Zəngəzur dəhlizi Azərbaycanı Naxçıvan Muxtar Respublikası ilə birləşdirməli olan nəqliyyat dəhlizidir. İkinci Qarabağ müharibəsinin nəticəsi olaraq noyabrın 10-da imzalanan atəşkəs bəyanatının 9-cu maddəsində həmin dəhlizin qurulması qeyd olunur:
[gallery columns="1" size="full" ids="11401"]
Ekspertlər hesab edir ki, bu yol ayrı qalan ərazilərimizi bir-birinə bağlamaqla yanaşı, həm də Avropa ilə Asiya arasında əsas tranzit xəttin yaranmasını təmin edəcək. Bu da imkan verəcək ki, Çindən, Hindistandan, həm də Orta Asiyadan Türkiyə və Avropaya mal hərəkət etsin. Bu zaman İpək yolu xətti yenidən bərpa olunacaq. Eyni zamanda Azərbaycanın İran üzərindən Naxçıvanla əlaqəsini sıfıra endirmiş olacaq. Hazırda ölkəmiz Naxçıvana qaz vermək üçün İrana 15% əlavə xərc edir.
“İqtisadi baxımdan bu dəhliz, nominal ÜDM-i 1,1 trilyon $-dan çox olan türkdilli ölkələri birləşdirməklə yanaşı, Azərbaycanın strateji əhəmiyyətini də artıracaqdır. Bu isə türk dövlətlərinin güclənməsini, beynəlxalq və regional siyasi proseslərdə iştirakını daha təsirli edəcəkdir”. Bunu Milli Məclisin deputatı Vüqar Bayramov deyib.
Dəhlizin açılması Azərbaycanla Türkiyənin quru və dəmir yolu xətti ilə birbaşa birləşməsini həyata keçirəcəkdir. Digər bir tərəfdən komunikasiyaların açılması bölgədə yeni əməkdaşlıq platformalarının yaradılmasına gətirib çıxaracaq ki, bu da regionda uzunmüddətli sülhün, əminamanlığın təmin olunmasında mühüm rol oynayacaq.
Bu dəhliz Rusiyaya Fars körfəzindən limanlara birbaşa çıxış imkanlarını asanlaşdıra bilər. Bundan başqa Rusiya Azərbaycan üzərindən loqistik fəaliyyətini daha sərfəli şərtlərlə həyata keçirə biləcək. Bununla da Zəngəzur dəhlizi Azərbaycana və region ölkələrə dividentlər qazandıracaq.
Hazırda dəhlizin Azərbaycan tərəfindəki Horadiz-Cəbrayıl-Zəngilan-Ağbənd hissəsinin tikintisi aparılır. 4-6 hərəkət zolağından ibarət olacaq yolun uzunluğu 124 km təşkil edəcək. Sözügedən yolun tikintisinin 2024-ci ildə başa çatdırılması nəzərdə tutulur.
