Ötən ilin bu günü, oktyabrın 20-də Azərbaycan ordusu Zəngilan şəhərini və Füzuli, Cəbrayıl, Xocavənd və Zəngilan rayonlarının 24 kəndini işğaldan azad edib. Bu barədə Prezident İlham Əliyev xalqa müraciətində xəbər verib.
Həmin çıxışda dövlət başçısı xalqın ona olan etimadından danışıb: “Mən deyirdim ki, biz o torpaqlara qayıdacağıq, mən deyirdim ki, bilirəm, nəyi nə vaxt və necə etmək lazımdır. Xalq tərəfindən mənə göstərilən etimad imkan verdi ki, biz bu məsələni həll edək. Prezident kimi mənim əsas vəzifəm Azərbaycan torpaqlarının qaytarılmasıdır və bu gün biz bunu döyüş meydanında edirik”.
“Bu gün Ermənistan rəhbərliyi yaxşı fikirləşməlidir. Artıq bizim qarşımızda diz çöküb, onlara diz çökdürmüşük, onlara layiq olan yeri göstərmişik. Qovuruq onları bizim torpaqlarımızdan, bundan sonra da qovacağıq! Hər gün bayrağımız yeni bir yaşayış məntəqəsində ucaldılır. Budur, Azərbaycan dövlətinin, Azərbaycan xalqının gücü”, - deyə İlham Əliyev əlavə edib.
Öz çıxışında dövlət rəhbəri Azərbaycan vətəndaşlarının azad edilmiş torpaqlara qayıdaraq rahat yaşamaları üçün əlindən gələni edəcəyini bildirib.
Qeyd edək ki, hazırda Zəngilan rayonunun ərazisində 200 yaşayış evindən ibarət olan “Ağıllı kənd”in tikintisi davam edir. Kənd yeni tikilən Zəngilan aeroportunun 5 kilometr aralığında yerləşir. İşlərin ilin sonuna kimi yekunlaşması planlaşdırılır. Prezidentin tapşırığına əsasən, Zəngilan aeroportu isə 2022-ci ildə istifadəyə verilməlidir.
