Azərbaycan mediasında Goranboy şəhər 2 saylı tam orta ümumtəhsil məktəbində müvəqqəti direktor vəzifəsini icra etmiş İlhamə Qasımovanın təhsil ocağının əmlakına zərər vurması ilə bağlı iddialar yayılıb.
Hazırda həmin məktəbdə tarix müəllimi kimi çalışan İlhamə Qasımovanın icra etdiyi vəzifəsindən azad edildikdən sonra təhsil ocağının sanitar qovşağını dağıtdığı, burada quraşdırılmış unitaz və əl-üz yuma avadanlıqlarını sökərək öz evinə apardığı iddia olunur.
Məsələ ilə bağlı redaksiyamız tərəfindən Gəncə-Daşkəsən Regional Təhsil İdarəsinə sorğu ünvanlanıb.
Qurumdan bildirilib ki, məsələ ilə bağlı araşdırma aparılıb. Sözügedən ümumi təhsil müəssisəsində bəzi avadanlıqların zədələnməsi və ya yerində olmaması ilə bağlı problemin mövcud olduğu müəyyən edilib.
"Hazırda həmin avadanlıqların təmir edilərək istifadəyə yararlı vəziyyətə gətirilməsi və problemin yeni tədris ilinin başlanmasına qədər aradan qaldırılması nəzərdə tutulur", – təhsil idarəsindən bildirilib.
Beləliklə, aidiyyəti qurum məktəbdə bəzi avadanlıqların zədələnməsi və ya yerində olmaması faktını təsdiqləyib. Lakin bu halın konkret olaraq İlhamə Qasımova tərəfindən törədilib-törədilmədiyi ilə bağlı suala cavab verilməyib.
Mənbə: Gəncəxəbər
