Uqandanın Toro Krallığının kralı, bir vaxtlar dünyanın ən gənc monarxı kimi tanınan Oyo Nyimba Kabamba Iguru Rukidi IV vəfat edib.
İnsanoid.com xəbər verir ki, 34 yaşlı kralın ölümü ilə bağlı məlumatı yerli mənbələr yayıb. Onun ölüm səbəbi hələlik açıqlanmayıb.
Kral Oyo 1995-ci ildə, cəmi 3 yaşında taxta çıxıb. O, atası Kral Patrick Kaboyo Olimi III-ün vəfatından sonra Toro Krallığının hökmdarı elan edilib.
Uşaq yaşında taxta çıxması Oyonu dünyanın ən gənc hakim monarxlarından birinə çevirib. O, illər ərzində Toro xalqının mədəni və ənənəvi lideri kimi fəaliyyət göstərib.
Toro Krallığı Uqandanın qərbində yerləşir. Uqanda respublika olduğundan kralın ölkənin siyasi idarəçiliyində formal hakimiyyəti yoxdur. Buna baxmayaraq, Toro kralı regionda mühüm ənənəvi və ictimai nüfuza malikdir.
Qeyd edək ki, Oyo Rukidi IV 18 yaşına çatdıqdan sonra krallığın ictimai və mədəni fəaliyyətlərində daha fəal iştirak etməyə başlayıb.
