Azərbaycanlı kulinar Fərhad Aşurbəyli və onunla səfərdə olan şəxslər Nepalda təbii fəlakətin baş verdiyi ərazidə qalıblar.
Aşurbəyli bildirib ki, komanda səhər saat 07:00 radələrində Katmandudan yola çıxmalı olsa da, səfəri saat 10:00-a qədər təxirə salıb.
"Tənbəlliyimiz bizi xilas etdi. Məhz selin baş verdiyi vaxt həmin yoldan keçməli idik. Amma nədənsə səhər saat 7-də yola çıxmağa ərinib, dincəlmək və doyunca səhər yeməyi yemək qərarına gəldik. Saat 10-da yola çıxdıq", – deyə o bildirib.
Onun sözlərinə görə, bu gecikmə onların həyatını xilas edib. Bandipur istiqamətində hərəkət edən qrup magistralın bir neçə hissəsinin tamamilə dağıldığını görüb. Buna görə də onlar alternativ yollar axtarmağa məcbur olublar.
Aşurbəylinin sözlərinə görə, yolların vəziyyəti olduqca ağırdır. Səyyahlar bu səbəbdən əvvəlcədən transfer şirkəti ilə əlaqə saxlayıblar. Onların yolların nisbətən boş ola biləcəyi vaxtda - cümə günündən şənbəyə keçən gecə yolsuzluq avtomobili ilə ərazidən çıxarılması planlaşdırılır. Ehtiyat variant kimi kənd yolları ilə mopedlərlə hərəkət etmək də nəzərdən keçirilir.
Aşurbəyli hazırda onların həyatı üçün təhlükə olmadığını bildirib.
Azərbaycanın Dehlidəki səfirliyi onlarla əlaqə saxlayaraq yardım təklif edib.
Mənbə: Minval
