Məşhur fotoqraf və səyahətçi Vahid Həsənov xaricdə olarkən mopedlə qəzaya uğrayıb.
İnsanoid.com xəbər verir ki, bu barədə onun yoldaşı Həsti Həsənova "Instagram" səhifəsində məlumat verib.
Onun sözlərinə görə, Vahid çox çətinliklə hərəkət edir, ayağa qalxmaqda və yemək yeməkdə çətinlik çəkir:
"Bir anda hər şeyin necə alt-üst ola biləcəyini bir daha öyrəndik. Əslində, bu gün Bakıda olmalı idik. Adadakı son günümüzdə mopedlə qəzaya uğradıq. Həyatımda heç vaxt belə qorxmamışdım… Yolda gedirdik və bir anda gözüm qaraldı. Oyandım ki, moped aşıb; mən bir tərəfdə, Vahid başqa tərəfdə qan içində uzanmışıq. Hamı ətrafımıza yığılıb, biri su verir, biri əşyalarımızı toplamağa kömək edir. Vahid özünü itirmişdi, gözləri bağlı halda hərəkət edə bilmirdi. Həmin an ürəyim dayanacaqmış kimi hiss etdim. Təcili yardım gəldi, Vahidi təcili əməliyyata apardılar. Mənim bədəmimin qanını təmizləyib sakitləşdirməyə çalışırdılar. Elə bir şoka düşmüşdüm ki, ayaqlarımı hiss edə bilmirdim, ayağa qalxa bilmirdim, əllərim qıc olmuşdu. Vahidin isə 9 qabırğasında, körpücük sümüyündə sınıq və çiynində çat var. Çox çətinliklə hərəkət edir, ayağa qalxması, yemək yeməsi belə çox çətindir. Nə edə bilərik, belə şeylər də olur. Heç vaxt (bunu) paylaşmamışam, amma hər kəs elə bilir ki, biz ən mükəmməl həyatı yaşayırıq. Sadəcə, mənfi şeyləri bölüşməyi sevmirəm. Allah bizi həqiqətən qoruyub".
