Ceyms Uebb kosmik teleskopu kainatda bir anda altı fövqəladə böyük qalaktika kəşf edib. Bu barədə Oxu.az 23 fevral tarixində məlumat verib.
Onların kütləsi Günəşin kütləsindən təxminən 100 milyard dəfə çoxdur. Pensilvaniya Dövlət Universitetinin mətbuat xidməti çərşənbə günü bildirib ki, yeni kəşflər kosmoloqların kainatın ilk qalaktikalarının təkamülü ilə bağlı fikirlərini bir daha şübhə altına alır.
Alimlərin hazırkı fikirlərinə görə, ilk qalaktikalar kainatda böyük partlayışdan təxminən 300-400 milyon il sonra, onun maddəsi soyuq qaz buludlarının əmələ gələ biləcəyi, içərisində ulduzların yarana biləcəyi temperaturlara qədər soyuduqda meydana çıxıb. Elm adamları bir neçə onilliklər ərzində bu cür qalaktikaların kainatın kimyəvi təkamülündəki rolunu aşkara çıxarmaq ümidi ilə onların xassələrini axtarır və öyrənirlər.
Əvvəlcə astronomlar ilk qalaktikaların nisbətən kiçik olduğunu və yavaş-yavaş böyüdüyünü güman edirdilər. “Hubble” və digər güclü teleskopların son kəşfləri bunun əslində belə olmadığını göstərir. Böyük qalaktikalar artıq Kainatın həyatının ilk milyard ilində meydana çıxıb. Onların mövcudluğu hələ də elm adamları üçün böyük bir sirr olaraq qalır.
