Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun Ağstafa rayon şöbəsinin binasındakı mühafizəçi otağında yanğın olub. Bu barədə Report 24 fevral tarixində xəbər verib.
Ağstafa rayonunun 20 Yanvar küçəsində yerləşən inzibati binada mühafizəçi otağında baş vermiş yanğın zamanı orada mühafizəçi vəzifəsində çalışan 46 yaşlı K.Həsənov müxtəlif yanıq xəsarətləri alıb və xəstəxanaya yerləşdirilib.
Onun vəziyyəti kafi qiymətləndirilir.
Qeyd edək ki, ümumi sahəsi 15 kv.m olan mühafizəçi otağındakı yanğın hadisə yerinə cəlb olunan Fövqəladə Hallar Nazirliyinin Ağstafa Rayon Dövlət Yanğından Mühafizə Hissəsinin yanğınsöndürən briqadaları tərəfindən söndürülüb, yanğının ətrafa yayılmasının qarşısı alınıb.
Faktla bağlı araşdırma aparılır.
