Hazırda peyklə məlumat mübadiləsinin dayanmasına mümkün səbəb kimi kiçik ölçülü kosmik tullantı və ya meteorit ilə toqquşma ehtimal olunur. Bu barədə İctimai TV 20 aprel tarixində xəbər verib.
Toqquşma nəticəsində peykin enerji təchizatı sıradan çıxmış ola bilər. ABŞ-nin Kosmik Müşahidə Şəbəkəsi hazırda kosmik fəzada ölçüsü 10 sm-dan çox olan 36.500 obyekti izləyir. Lakin hesablamalara görə, planetimizin ətrafında Kosmik Müşahidə Şəbəkəsinin izləyə bilmədiyi kiçik ölçülü (1-10 sm) 1 milyondan çox obyekt hərəkət etməkdədir. Azersky peyki 45 milyon manat məbləğində sığortalanmışdır və artıq sığorta məbləğinin alınması işlərinə başlanmışdır.
"Azersky – Yerin məsafədən müşahidə peyki dizayn edilmiş istismar müddətindən 1 il daha tez, yəni fəaliyyətinin 9-cu ilində missiyasını başa çatdırmışdır. Belə ki, Azersky peyki ilə məlumat mübadiləsi dayanmışdır. Azərkosmos və peykin istehsalçısı tərəfindən Azersky peyki ilə əlaqənin bərpa olunması istiqamətində tədbirlər görülsə də, peyk ilə əlaqə yaratmaq mümkün olmamışdır".
Bu barədə Rəqəmsal İnkişaf və Nəqliyyat Nazirliyindən bildirilib.
