1993-cü il aprelin 3-də Ermənistan silahlı qüvvələri Kəlbəcər rayonunun Başlıbel kəndinə silahlı hücum edərək kənd sakinlərinə məxsus evləri qarət edib və tamamilə yandırıb. Kəndi tərk edə bilməyən 62 nəfər təxminən 3 kilometr aralıda, kəndin ən hündür hissəsində yerləşən “Portda” ərazisindəki təbii mağaralara sığınıb. Törətdikləri vəhşiliklərlə kifayətlənməyən ermənilər aprelin 18-də silahsız mülki şəxslərin sığındığı yerləri axtararaq aşkarlayıb, köməksiz vəziyyətdə qalmış insanları atəşə tutmağa başlayıblar. Nəticədə silahsız, hər hansı müqavimət göstərmək imkanına malik olmayan 12 nəfər (1-i uşaq, 1-i yeniyetmə olmaqla) qətlə yetirilib, 14 nəfər girov götürülüb.
Sağ qalmış 30 nəfər Başlıbel kənd sakini sonrakı tarixlərdə iki qrupa bölünməklə müxtəlif mağaralarda gizlənib, mühasirə həyatını davam etdirib. Onlar həyatları üçün yaranmış təhlükələrə baxmayaraq, 1993-cü il mayın 12-də gecə saatlarında həmyerlilərinin qətlə yetirildiyi mağaraların yanına yaxınlaşıb 12 nəfərin meyitini dəfn ediblər. Sağ qalanlar 113 gün mühasirə həyatı yaşadıqdan sonra, yalnız gecələr gizli dağ yolları ilə hərəkət edərək, 17 iyunda Daşkəsən rayonunun Zivlən kəndinə çatıblar və həyatlarını xilas edə biliblər.
24 aprel 2021-ci ildə Kəlbəcər rayonunun Başlıbel kəndində müvafiq istintaq hərəkətləri keçirilib və 50 santimetr dərinlikdə torpağa basdırılmış, kəskin çürüməyə məruz qalaraq skeletləşmiş 12 nəfərin meyitinin qalıqları aşkarlanıb.
