Cəlilabad rayonunun Kövüzbulaq kənd tam orta məktəbi uçmaq təhlükəsi ilə üz-üzədir. Bu haqda aprelin 21-də Report-a kənd sakinləri məlumat verib.
Onların dediklərinə görə, məktəbin zirzəmisi tamamilə su ilə doludur, pəncərələrin şüşələri isə tökülüb.
“Məktəb daş panellərlə tikilib. O panellər də, demək olar ki, hamısı ayrılıb bir-birindən. Belə yerdə şagirdlərin təhsil alması çox çətindir”, - deyə uşaqların valideynləri vurğulayıb.
Məktəbin direktoru Cahangir Əliyev bildirib ki, məktəb üçün yeni binanın inşası gözlənilir və bununla bağlı aidiyyəti qurumlara məlumat verilib. O əlavə edib ki, kənddə tədris üçün uyğun yer olmadığından hələlik şagirdlər bu məktəbdə təhsil alırlar: “Buna baxmayaraq, məktəbin qəzalı vəziyyətdə olması şagirdlərin dərsə davamiyyətinə təsir etmir”.
