Çinin Fucien vilayətində dünyanın ən böyük külək enerjisi turbini quraşdırılıb. İnsanoid bu barədə 30 iyun tarixində Lent.az-a istinadən xəbər verir.
16 meqavat gücü olan turbinin dənizdə quraşdırılmasına iyunun 25-də start verilib. Təxminən 10 min komponentdən ibarət olan və çəkisi 20 tona çatan turbin külək enerjisini elektrikə çevirəcək. Dirəyinin hündürlüyü 152 metr, pərinin uzunluğu 123 metr, mexanizm otağının və generatorunun birgə çəkisi isə 385 tondur.
Turbin tam gücü ilə dövr edəndə 34,2 kilovat-saat elektrik enerjisi istehsal edə bilər. Onun illik istehsal gücü 66 milyon kilovat-saat qiymətləndirilir. Bu isə təxminən 36 min ailənin elektrik enerjisi tələbatını ödəməyə yetərlidir. Bununla da şərti olaraq, 22 min ton kömürə qənaət olunacaq, karbon emissiyası 54 min ton azalacaq.
Sahildən 35 kilometr məsafədə quraşdırılmış turbində havanın hərarətini, rütubəti, küləyin sürətini və digər məlumatları aşkarlayan yüzlərlə sensor quraşdırılıb. “Ağıllı” turbin hava şəraitinə uyğun
öz fəaliyyətini tənzimləyə biləcək. Belə ki, Sakit okeanın şimalı üçün səciyyəvi olan tayfun siklonu zamanı turbin təhlükəsiz və sabit fəaliyyəti üçün xüsusi rejimə keçəcək.
