Fransada ekstremal onlayn çağırışlarla tanınan strimer Rafael Qraven (onlayn adı: Jean Pormanove) bazar günü gecə Nitsa yaxınlığındakı Kontesdə (Contes) ölü tapılıb.
İnsanoid.com xarici KİV-ə istinadən xəbər verir ki, kirayə götürülmüş və yayım üçün istifadə edilən mənzildə baş verən hadisə ilə bağlı məhkəmə istintaqına başlanıb.
Mərhumun son canlı yayımı "Kick" platformasında gedərkən izləyicilər onun döşəyin üzərində hərəkətsiz uzandığını görüb və şərhlərə cavab vermədiyini bildiriblər. Məlumata görə, yayım təxminən 10 gün fasiləsiz davam edib.
Le Monde qəzetinin yazdığına görə, Qraven iki həmkarı ilə çəkdiyi videolarda təhqir və zorakılığa məruz qalması ilə tanınırdı. Kadrlardan birində onun döşəkdə uzanarkən üstünə su butulkası atıldığı görünür.
Fransanın rəqəmsal texnologiyalar naziri Klara Şappaz strimerin “aylarla alçaldılıb və zorakılığa məruz qaldığını” deyib və qanunsuz məzmunun yayılmasına görə platformaların məsuliyyət daşıdığını vurğulayıb.
Qravenin sosial şəbəkələrdə 1 milyondan çox izləyicisi var idi və o, xüsusilə 2022-ci ildə yaradılan, "Twitch"ə bənzər "Kick" platformasında populyarlıq qazanıb.
