“Tesla” və “SpaceX” şirkətlərinin, həmçinin “Twitter”in sahibi İlon Maskın sərvəti bir gündə 12,6 milyard dollar azalıb. Bu barədə 21 aprel tarixində Report “Bloomberg”ə istinadən məlumat yayıb.
Bildirilib ki, bu, 2023-cü ilin əvvəlindən bəri iş adamına dəyən ən böyük maddi ziyandır. Milyarderin sərvətinin belə nəzərəçarpacaq dərəcədə azalmasına səbəb kimi bu ilin birinci rübündə “Tesla”nın səhmlərinin 9,75% aşağı düşməsi və “Starship” kosmik gəmisinin prototipinin partlaması göstərilib.
Bundan başqa, İ.Mask “Twitter” istifadəçilərinin böyük bir hissəsinin aylıq 8 dollar olan ödənişli “Twitter Blue” abunəliyini yeniləməkdən imtina etməsi səbəbindən pul itirib.
Qeyd edək ki, 51 yaşlı amerikalı sahibkarın sərvəti təxminən 164 milyard dollar qiymətləndirilir.
