“Mobil” şərti adı altında narkotik satışını təşkil edən iranlı narkotacirin 5 nəfərdən ibarət dəstəsi tutulub. Bu barədə 8 aprel tarixində Daxili İşlər Nazirliyi (DİN) xəbər yayıb.
Nəsimi Rayon Polis İdarəsi, eləcə də ərazi polis şöbə və bölmələrinin əməkdaşları tərəfindən əməliyyat keçirilib. Narkotik satan Hüseyn Osmanov, Eldəniz Quliyev, Elyanar İbrahimov, Xəyalə Abbasova və Elmir Məmmədov saxlanılıblar.
Onlardan 3 kiloqrama yaxın heroin və metamfetamin götürülüb. Saxlanılan şəxslər narkotik vasitələri sosial şəbəkələrdə tanış olduqları “Mobil” adlı İran vətəndaşından onlayn satmaq üçün əldə etdiklərini və həmin şəxs tərəfindən narkokeryerliyə cəlb olunduqlarını bildiriblər. Həmçinin onların gənclər və yeniyetmələr arasında narkotik vasitələrin təbliği ilə məşğul olduqları da müəyyən edilib.
Faktlarla bağlı Nəsimi Rayon Polis İdarəsində araşdırmalar aparılır.
