Son günlər müzakirə edilən məsələlərdən biri kredit faizlərinin yüksək olmasıdır. Bəs faizlərin yüksək olması nə ilə bağlıdır və onların aşağı salınması üçün nələr edilməlidir? Məsələ ilə bağlı aprelin 29-da millət vəkili, iqtisadçı-ekspert Vüqar Bayramov paylaşım edib.
Millət vəkili bildirib ki, Mərkəzi Bank orta kredit faizlərini hesablayan zaman bütün növ kreditləşmə üzrə qiymətləndirmə aparır: “Hesablamalara görə, ölkə üzrə orta kredit faizi 12% , milli valyutada isə 14%-dir. Lakin vətəndaşların daha çox istifadə etdiyi istehlak kreditləri üzrə faizlər elan olunan rəsmi orta rəqəmlərdən daha yüksəkdir”.
V.Bayramov bunu bank sektorunda rəqabətin zəif olması ilə əlaqələndirib.
“İnkişaf etmiş ölkələrin təcrübəsi göstərir ki, kredit faizlərinin azalması birbaşa banklar arasında rəqabətin gücləndirilməsindən keçir”, - deyə o qeyd edib.
Sonda ekspert əlavə edib ki, kredit faizlərinin aşağı salınması üçün bank sektorunda rəqabətin güclənməsinə və kreditlərə əlçatanlığın artırılması üçün Mərkəzi Bank tərəfindən daha sistemli tədbirlərin həyata keçirilməsinə ehtiyac var.
Daha öncə millət vəkili Tahir Kərimli də məsələyə münasibət bildirmişdi. O, kreditlərin illik faiz dərəcəsini 20%-dən 5-6%-ə endirməyi təklif etmişdir.
