Polis əməkdaşları tərəfindən həyata keçirilən əməliyyat tədbirləri ilə vətəndaşların etibarından sui-istifadə etməklə dələduzluq əməllərində şübhəli bilinən şəxs saxlanılıb. Bu barədə 20 iyul tarixində APA Daxili İşlər Nazirliyinə istinadən məlumat verib.
Araşdırma zamanı müəyyən edilib ki, əvvəllər məhkum olunmuş paytaxt sakini Babazadə Elvin Firudin oğlu özünü ali rütbəli - (general-mayor) əməkdaş kimi təqdim edərək, insanların pul vəsaitlərini ələ keçirib.
Cari ilin aprel-may ayları ərzində ayrı-ayrı zərərçəkənlərə müxtəlif vədlər verərək, onların ümumilikdə 61 700 manatını dələduzluq yolu ilə talayıb.
Faktla bağlı E.Babazadə barəsində Cinayət Məcəlləsinin dələduzluq maddəsi ilə cinayət işi başlanılıb, məhkəmə qərarı ilə barəsində həbs qətimkan tədbiri seçilib.
Hazırda onun cinayət əlaqələrinin müəyyən edilməsi istiqamətində əməliyyat-istintaq tədbirləri davam etdirilir.
“Onun əməllərindən zərərçəkmiş başqa vətəndaşlar DİN-in 102 Zəng Mərkəzinə və sosial şəbəkələrdəki səhifələrinə müraciət edə bilərlər”, - məlumatda qeyd olunub.
