Yeni Zelandiyanın “Air New Zealand” şirkəti bu gündən etibarən xaricə səyahət edən sərnişinləri tərəzidə çəkəcək. Bu barədə İnsanoid aviaşirkətin mətbuat xidmətinə istinadən bu gün, 1 iyun tarixində məlumat verir.
Yeni qayda test rejimində 1 ay ərzində baş tutacaq. Aviaşirkət hesab edir ki, bu müddət ərzində 10 min sərnişinin çəkisini hesablamaq mümkün olacaq.
Məlumatlar təyyarənin çəkisi və balansı hesablanarkən sərnişinlərin orta ağırlığını müəyyən etmək üçün toplanır və pilotlar uçuşdan əvvəl bunu bilməlidirlər.
“Air New Zealand”ın Yükə Nəzarət Təkmilləşdirmə mütəxəssisləri sərnişinləri əmin ediblər ki, onların çəkisi hava limanında məxfi qalacaq.
“Təyyarədə gedən yük və qidadan tutmuş anbardakı baqajlara qədər hər şeyi çəkirik. Sərnişinlər, ekipaj üzvləri və əl yükü üçün biz bu sorğudan əldə etdiyimiz orta çəkidən istifadə edəcəyik”, - deyə qurumdan əlavə edilib.
Sorğu ölkənin Mülki Aviasiya Qurumunun tələbidir.
O da vurğulanır ki, “Air New Zealand” şirkətinin Yeni Zelandiya daxilində səyahət edən müştəriləri 2021-ci ildən çəkilir.
