“Valideynlər uşaqları vaxtında qızılcaya qarşı peyvənd etdirməlidirlər”. Bunu TƏBİB-nin Tibbi xidmətlərin inkişafı departamentinin rəhbəri Yaqut Qarayeva deyib.
Bu barədə 28 aprel tarixində APA məlumat verib.
Həkim bildirib ki, qızılca yeni xəstəlik deyil:
“ Valideynlərə demək istəyirəm ki, buna qarşı peyvənd 1960-cı ildən var və bir yaşına qədər uşaqlara vurulur. Son zamanlar yayılan problemin səbəbi COVİD-19 pandemiyası dövründə rutin vaksinasiya ilə əlaqəli tibbi əlçatanlığın zəifləməsi ilə bağlı yaranıb”.
Həkim qeyd edib ki, bu xəstəliyə ya yoluxursan, ya da vaksinlə öncədən immunitet qazanırsan.
Yaqut Qarayeva qeyd edib ki, bir qrupda hansısa uşaqda qızılca aşkarlanarsa, onun yayılması mümkündür:
"Bu xəstəliyi hər kəs fərqli keçirir və buna görə mütləq həkimə müraciət etmək lazımdır. Valideynlər sahə həkimlərinə uşaqlarının vəziyyəti barədə xəbər vermədikləri təqdirdə, bununla bağlı ümumi tədbir görülməsi də çətinləşir. Buna görə valideynlər uşaqlarında bu xəstəliyin əlamətlərini hiss edərlərsə, sahə həkiminə müraciət etməlidirlər”.
