Tovuzdan ailə qurmaq məqsədilə Xaçmaza qaçan 13 yaşlı qız ailəsinə təhvil verilib. Bu barədə 24 may tarixində APA məlumat verib.
2010-cu il təvəllüdlü Ə.Tağıyeva polis əməkdaşları tərəfindən Xaçmazda valideynlərinə təqdim olunub.
Ailə üzvləri azyaşlını evlərinə aparmaq üçün Xaçmaza gəliblər. Cinayət işi üzrə azyaşlının ifadəsi alınıb və müvafiq ekspertizalar təyin olunub.
Qeyd edək ki, mayın 20-də Tovuzda 13 yaşlı qızın itkin düşməsi barədə məlumat yayılıb. 2010-cu il təvəllüdlü Ə.Tağıyevanın yaşadığı evdən çıxıb naməlum istiqamətə gedərək itkin düşdüyü açıqlanıb. Sonradan onun ailə qurmaq istəyi ilə Xaçmaz rayonuna getdiyi bildirilib. Polisin keçirdiyi axtarış tədbirləri nəticəsində rayon sakini Ə.Tağıyevanın yeri Xaçmaz rayonunda müəyyənləşdirilib. Onun qaçdığı şəxs polis əməkdaşları tərəfindən saxlanılıb.
Ə. Tağıyevanın Xaçmaz rayonuna qaçması ilə əlaqədar saxlanılan S. Kavazov barəsində cinayət işi başlanılıb.
Araşdırmalar davam etdirilir.
Məlumata görə, saxlanılan şəxsin 44 yaşı var. Onun ilk nikahından övladlarının olduğu bildirilir.
