14 fevral 1992-ci ildə Milli Ordunun Hərbi Hava Qüvvələri (HHQ) ayrıca bölmə kimi təsis olunub və həmin vaxtdan bu tarix Hərbi Hava Qüvvələri Günü kimi qeyd olunur.
Azərbaycanın hərbi-hava qüvvələrinin təşkilinə dair ilk addımlar AXC dövründə, 1919-cu ildə atılıb. 16 iyun 1919-cu ildə Azərbaycan-Gürcüstan hərbi əməkdaşlıq müqaviləsi bağlanıb və bundan sonra Azərbaycandan bir qrup əsgər və zabit Gürcüstana ezam olunub. Onlardan 9 nəfəri hərbi təyyarəçi peşəsinə yiyələnməli idi. Növbəti addımlardan biri ordunun hərbi-hava strukturunun rəhbərliyinin müəyyənləşdirilməsi oldu. Hərbi nazirin 1919-cu il 19 avqust tarixli əmri ilə podporuçik Teymur xan Əfşar aviasiya dəstəsinin rəis müavini təyin edildi. Həmin ilin sentyabr ayının 14-də aviasiya dəstəsinin ştatı təsdiq olunub. Ştatın tərkibində 5 zabit, 4 məmur, 54 nizami əsgər və 4 qeyri-nizami əsgər olub.
Müstəqillik bərpa edildikdən sonra HHQ-nin milli hərbi qurum kimi formalaşdırılması 1992-ci ildə davam etdirilib. Son 20 il ərzində ölkəmizdə müdafiəyə ayrılmış vəsaitlərin vacib hissəsi məhz HHQ və Hərbi Hava Müdafiə Qüvvələrinə (HHMQ) sərf edilib.
1997-ci ildən Azərbaycan Ali Təyyarəçilik Məktəbi gənc zabitləri hazırlamağa başlayıb. Bu gün Heydər Əliyev adına Hərbi İnstitutda da müxtəlif ixtisaslar üzrə peşəkar zabitlər hazırlanır.
