Bu gün, oktyabrın 18-də tarixi abidələrimizdən olan Xudafərin körpüsündə Azərbaycan bayrağının ucaldılmasından 1 il ötür.
Araz çayı üzərində salınmış iki körpü Cəbrayıl rayonunun ərazisində yerləşir. Onlardan biri 1027-ci ildə Şəddadi, digəri isə XIII əsrdə Elxanilər tərəfindən inşa edilib. Hər iki körpü İpək yolunun üzərində yerləşir və Azərbaycanla İranı birləşdirir.
Şəddadi hökmdarı Fəzl ibn Məhəmməd tərəfindən inşa olunan körpü Rəvvadilərlə mübarizə aparmaq üçün tikilib. Bu abidənin bir hissəsi Qacarların yürüşü zamanı məhv olunsa da, sonradan bərpa edilib və dövrümüzə qədər gəlib çatıb.
Elxanilər dövründə qurulan körpünün isə yalnız 3 aşırımı salamatdır.
İran tarixçisi Həmdullah Qəzvini əsərlərində körpülərin adını "Xuda-Afərin" kimi yazır. Bu farsca "Allah tərəfindən yaradılmış", "Allaha Mərhəba" deməkdir.
