2020-ci il sentyabrın 27-də Ermənistan silahlı qüvvələrinin genişmiqyaslı təxribatlarına cavab olaraq Azərbaycan Ordusu “Dəmir yumruq” adlanan əks-hücum əməliyyatına başladı. 44 gün davam edən Vətən müharibəsi ilə təxminən otuzillik işğala son qoyuldu və Azərbaycanın ərazi bütövlüyü bərpa edildi. Müzəffər Ali Baş Komandan İlham Əliyevin rəhbərliyi ilə qazanılan bu möhtəşəm Zəfər tariximizə qızıl hərflərlə yazıldı.
Müharibənin 35-ci günü (31 oktyabr):
– Döyüş əməliyyatları Ağdərə, Xocavənd və Qubadlı istiqamətlərində davam edib. Müdafiə Nazirliyinin məlumatına görə, düşmənin xeyli sayda canlı qüvvəsi və hərbi texnikası, o cümlədən T-72 tankları, piyada döyüş maşınları, “Smerç” və BM-21 “Qrad” yaylım atəşli reaktiv sistemləri sıradan çıxarılıb.
– Prezident İlham Əliyev Almaniyanın ARD televiziya kanalına müsahibə verib və müharibə ilə bağlı sualları cavablandırıb.
– Qubadlını artilleriya atəşinə tutan düşmən qüvvələrinə cavab zərbələri endirilib və Ermənistan ordusunun kəşfiyyat-diversiya qrupu məhv edilib.
– Baş Prokurorluğun məlumatına görə, Ermənistanın təxribatları nəticəsində sentyabrın 27-dən oktyabrın 31-i saat 13:00-a qədər 91 mülki şəxs həlak olub, 404 nəfər yaralanıb, 2465 ev, 97 çoxmənzilli bina və 455 mülki obyektə ciddi zərər dəyib.
Bu döyüşlər Azərbaycan Ordusunun əzmkarlığı və gücü ilə düşmənin mövqelərini zəiflədərək ərazilərin azad edilməsinə töhfə verdi.
