Azərbaycanəsilli ukraynalı idmançı Aida Kərimova qadın güləşi dünyasında sürətlə ən diqqətçəkən adlardan birinə çevrilir.
İdman.Biz xəbər verir ki, Donbasda doğulmuş, Toretsk şəhərində böyümüş və Sergey Bubkanın adını daşıyan Donetsk Olimpiya Ehtiyatları Ali Məktəbinin yetirməsi olan Aida 50 kq çəki dərəcəsində çıxış edir. Bu uzun illər Azərbaycan bayrağı altında çıxış edən ukraynalı Mariya Stadnikin parladığı çəki dərəcəsidir.
Aida Kərimova Serbiyanın Novi Sad şəhərində keçirilən 23 yaşadək güləşçilər arasında dünya çempionatında bürünc medal qazanıb və bu turnirdə belə uğura imza atan ilk ukraynalı olub. O, yarımfinalda amerikalı Odri Ximenezə (5:2) məğlub olsa da, daha sonra bürünc medal uğrunda mübarizədə venesuelalı Noxalis Loyo Ximenezi (9:7) məğlub edərək fəxri kürsüdə yer alıb.
2024-cü ildə Kərimova Novi Sad şəhərində keçirilən Avropa çempionatının gənclər yarışında rəqiblərinə bir xal belə vermədən parlaq qələbə qazanıb. Finalda o, isveçrəli Svenya Yunqonu (7:0) inamla məğlub edib, bundan öncə isə rumıniyalı Nikoletta Bayanı və neytral statuslu rusiyalı idmançı Violetta Biryukovanı tuşla məğlubiyyətə uğradıb. Daha sonra, İspaniyanın Pontevedra şəhərində keçirilən gənclər arasında dünya çempionatında Aida hindistanlı idmançı Muskanı üstələyərək bürünc medal qazanıb.
Hələ 15 yaşında Kərimova 2019-cu ildə 43 kq çəki dərəcəsində Avropa çempionu adını qazanıb. Kərimova o zaman da özünəməxsus üslubunu - aqressiv texnikasını və görüşləri vaxtından əvvəl başa vurmaq bacarığını nümayiş etdirmişdi.
Azərbaycan diasporunun məlumatına görə, Aidanın atası Yevlaxdandır. Bəlkə də məhz bu ikili kimlik - Ukrayna məktəbi ilə Azərbaycan dözümlülüyü və temperamentinin sintezi onun güləşini xüsusi edir: dinamik, xarakterli və təsirli.
Avropa qızılından və dünya çempionatlarının bürünc medallarından sonra Aida Kərimova qadın güləşinin gənc nəsli arasında liderlər sırasında möhkəmlənib. 2025-ci ildə o, artıq sadəcə yüksələn ulduz deyil, Avropa və dünya çempionatlarında böyüklər arasında fəxri kürsüyə iddialı, real namizəddir. Kim bilir- bəlkə yaxın gələcəkdə Ukrayna və Azərbaycan güləşi bir daha birləşəcək, amma bu dəfə gənc və iddialı Aida Kərimovanın timsalında.
