İşğaldan azad edilmiş ərazilərdə 2021-ci il ərzində aşkarlanan silah-sursatın sayı açıqlanıb. Bu barədə yanvarın 3-də Daxili İşlər Nazirliyinin Mətbuat Xidmətinin Bərdə regional qrupu məlumat verib.
Məlumata əsasən, ərazi polis əməkdaşları tərəfindən ermənilərin tərk etdiyi 225 avtomat, 102 qumbaraatan, 68 pulemyot, 64 tank və piyada əleyhinə idarə olunan raket sistemləri, 10 minaatan qurğusu, 8 hava hücumundan müdafiə sistemləri, 721 qumbara, 129 mina, on minlərlə müxtəlif çaplı mərmi və patronlar aşkarlanıb.
Həmçinin sözügedən ərazidə yabanı halda bitən 17 tona yaxın çətənə bitkisi məhv edilib.
