Azərbaycan və İranın Araz çayı üzərində birgə inşa etdiyi "Xudafərin" və "Qız qalası" hidroqovşaqlarından yalnız 2-cidən suvarma məqsədi ilə istifadə olunacaq. Bu barədə Report 16 aprel tarixində Energetika Nazirliyinin nümayəndəsinə istinadən məlumat verib.
Onun sözlərinə görə, "Xudafərin" hidroqovşağından su götürmək mümkün olmayacaq və burada yalnız elektrik enerjisi istehsal ediləcək. Burada istehsal olunan elektrik enerjisi iki ölkə arasında bərabər bölünəcək. Nümayəndə bildirib ki, "Qız qalası" hidroqovşağı ilə bağlı layihələndirmə işləri aparılır. “Gələcəkdə qovşağın suyu ilə ilkin mərhələdə Cəbrayıl rayonunun, tədricən isə digər rayonların torpaqları suvarılacaq", - deyə o əlavə edib.
Qeyd edək ki, Araz çayı üzərində hidroqovşaq və SES-lərin tikintisinə 1992-ci ildə başlanılıb. Ermənistan Azərbaycan ərazilərinin bir hissəsini işğal etdikdən sonra tikinti işləri dayanıb və yalnız 2016-cı ildə İranla əldə olunmuş razılığa əsasən bərpa edilib.
SES-lərin tikintisinin 2-2,5 ilə yekunlaşdırılması nəzərdə tutulub.
