Azərbaycanın azad edilmiş ərazilərində aparılan bərpa layihələrində Cənubi Koreya şirkətlərinin iştirakı ilə bağlı bir sıra razılaşmalar əldə olunub. Bu haqda 6 sentyabr tarixində Trend-ə müsahibəsində Azərbaycanın Cənubi Koreyadakı səfiri Rəmzi Teymurov bildirib.
"Bu şirkətlər bərpa işlərinə böyük maraq göstərir və bu prosesə öz töhfələrini verməyə hazırdır. Koreya şirkətləri tikinti, infrastruktur yaradılması, obyektlərin layihələndirilməsi sahələrində liderdir. Məndə olan məlumatlara görə, iki ölkə arasında bu istiqamətdə artıq bəzi nəticələr əldə olunub", - səfir söyləyib.
Onun sözlərinə görə, koreyalı istehsalçıların yüksək texnologiyaları Azərbaycan bazarında geniş istifadə olunur.
"Koreya innovasiyaları Bakı şəhərinin idarəetmə sferasında, ali təhsil müəssisələri sistemlərində və əqli mülkiyyətin idarə olunmasında tətbiq olunur. Koreya tərəfi Azərbaycanın Dövlət Statistika Komitəsi ilə sıx əməkdaşlıq edir. Cənubi Koreyanın "Farmconnect" şirkəti Kənd Təsərrüfatı Nazirliyi yanında Tərəvəzçilik Elmi-Tədqiqat İnstitutu ilə "Smart Farming" texnologiyasının tətbiqi sahəsində əməkdaşlıq sazişi imzalayıb", - deyə Rəmzi Teymurov əlavə edib.
Həmçinin səfirin dediyinə əsasən, Azərbaycanın kənd təsərrüfatı məhsullarının Cənubi Koraya bazarına çıxartmaq üçün İxracın və İnvestisiyaların Təşviqi Fondu (AZPROMO) ilə əməkdaşlığa başlanılıb.
2006-cı ildən Azərbaycan və Cənubi Koreya arasında 60-dan çox ticari-iqtisadi xarakterli saziş imzalanıb.
2020-ci ildə pandemiyaya baxmayaraq iki ölkə arasında ticarət dövriyyəsi 2019-cu illə müqayisədə 10% artaraq 179 milyon dollar təşkil edib.
